Hunga Whakahoki me te Rōpū Tohutohu 

Te Herekiekie Haerehuka Herewini

Kaiwhakahaere Kaupapa Pūtere Kōiwi Te Herekiekie Herewini

Ko Te Herekiekie Haerehuka Herewini he uri nō Ngāti Tūwharetoa, Ngāti Whakaue, Ngāti Apa, Ngā Rauru Kītahi, Whanganui, Ngā Puhi, me Ngāti Porou. I tipu ake a ia i Rātana Pā i mua i te nukutanga o te whānau ki Te Whanganui-a-Tara i ngā tau o 1970.

I mua i tēnei mahi, i roto a ia i ētahi tūnga teitei hei:

  • Kaitohutohu Matua i Te Manatū Pūtaiao
  • Kaiwhakahaere Rangahau i Te Kaunihera Rangahau Hauora o Aotearoa
  • Kaiwhakahaere ā-Motu i Te Tūāpapa Mate Āraikore o Aotearoa.

He Tohu Paerua (Kairangi) tā Te Herekiekie i roto i te Akoranga Māori nō Te Whare Wānanga o Tāmaki Makaurau.

 

Amber Kiri Aranui

Pou Rangahau Rautaki Kōiwi Amber Aranui

He uri a Amber Kiri Aranui nō Waikato, Ngāi Tahu, Ngāti Tūwharetoa, me Ngāti Kahungunu. I whānau mai, ā, i tipu ake a ia i Heretaunga ki Te Whanganui-a-Tara.

I mua i tōna haerenga mai ki te Rōpū Whakahoki Kōiwi (Repatriation Team), i mahi a Amber mō te Heritage Team ki Opus International Consultants. I reira i whakahaerea e ia ētahi rangahau huakanga me ētahi pūrongo puta noa i te takiwā raro o Te Ika a Māui me Te Waipounamu.

Kua oti anō i a ia te whakahaere ētahi tātai huakanga me ētahi rangahau mō Te Papa Atawhai. I roto anō ia i ngā huakanga nunui i Te Whanganui-a-Tara, Taranaki, me ngā takiwā o te Moana-a-Toitehuatahi.

He Tohu Paerua i te Mātai Huakanga tā Amber nō Te Whare Wānanga o Tāmaki Makaurau. He pakari ōna here ki ētahi iwi me ētahi hapū nā aua tau e 5 i te mahi huakanga.

He ngākaunui tō Amber mō te rangahau, otirā mō te hītori Māori me te whakamahi i te weu ki Aotearoa me ngā moutere whānui ake o Te Moananui-a-Kiwa. Ka mauria mai e ia tēnei ngākaunui me ngā tau roa ki te Rōpū Whakahoki Kōiwi.

 

Mona-Pauline Mangakāhia 

Kaitohutohu Kōiwi TangataMona-Pauline Mangakahia

E whai ake nei ngā karanga iwi, hapū o Mona-Pauline Mangakāhia, ko Ngāti Koata rātou ko Ngāti Kuia, ko Ngāi Tahu, ko Ngāti Maru, ko Ngāti Tamaterā, ko Ngāti Whanaunga, ko Ngāti Raukawa, ko Rangitāne, ko Ngāti Kahungunu ki Wairarapa, ko Te Arawa, ko Ngāti Huarere, ā, he whakapapa Kōtimana, Wīwī, Pāniora, Huiterangi hoki ōna. I tipu ake ia ki te tāone iti nei o Wharetītī, nāwai rā i hūnuku atu tōna whānau ki te Papaioea.

I puta mai a Mona-Pauline i Te Kunenga ki Purehuroa (Massey University), ā, kei te whai tonu i tana Tohu Paetahi Māoritanga. Kei te ngākau nui ia ki ngā tikanga me ngā taonga tuku iho a kui mā, a koro mā. He wahine kōrero Māori, he wahine pupuri i ngā tikanga Māori, ā, he rawe te kapa haka ki a ia.

I mua i tana kuhu mai ki te ohu o Karanga Aotearoa, i mahi a Mona-Pauline hei Kaiwhakahaere Rārangi Utu i Healthcare New Zealand. Tāpiri atu ki tēnā, i ia tau kua mahi a Mona-Pauline hei Kaiwhakarite Wānanga Tikanga mā te kaporeihana o Wakatū.  

   

Te Arikirangi Mamaku

Kaitohutohu Kōiwi Tangata

Currently on secondment

 

NGĀ KAIMAHI O MUA

 

Simon Jean 

Kaitūao Simon Jean-Pigne(Whiringa-ā-nuku 2011 - Whiringa-ā-rangi 2012)

He pia a Simon nō ngā Écoles des Hautes Études en Sciences Sociales i Parihi, Wīwī. I tēnei wā, kei te whai ia i tana Tohu Kairangi (PhD) Mātauranga Tikanga Tangata e arotahi ana ki te ahurea Māori me te whakahokinga mai o ngā kōiwi tangata i Wīwī. Ko Te Whare Wānanga o Te Ūpoko o Te Ika a Māui anō e āta tirotiro ana i tana whai Tohu Kairangi. I tutuki i a ia ana Tohu Paetahi (2008), Tohu Paerua (2010) i te Hītori i te Whare Wānanga o Rouen.

Koinei te whakangungutanga tuarua o Simon ki Te Papa. I te tau 2009 tana whakangungutanga tuatahi, e toru marama te roa, ko tāna he tuhi i ngā kōrero mō te kaupapa nei ki te reo Wīwī. Maringanui mātou i āna mahi i mārama ai ngā Muhiama, ngā Whare Wānanga o Wīwī ki ngā whāinga matua, ki ngā tikanga Māori, otirā, ki te kaupapa o Karanga Aotearoa. I Rouen hoki a Simon i te wā i āta wānangahia te whakahokinga mai o ngā Toi Moko i reira, nāwai rā, koia te tuatahi o ngā kohinga kōiwi tūpuna i whakahokia mai i Wīwī i te marama o Haratua, 2011.

Mō tēnei whakangungutanga, kei te hanga piriti, kei te whiri tonu a Simon i te taura here i waenganui i Te Papa Tongarewa me ngā pūtahitanga o Wīwī. Ko tāna he whakaatu i ngā rangahau pūtaiao nōna tata nei o Wīwī e pā ana ki te toi moko. Ko tētahi aronga whāiti o tana Tohu Kairangi, ko te rangahau kia mārama ai ngā tikanga tuku iho, ngā taura e here tonu nei i ngā uri ki ngā toi moko me te tā moko. Kei te ngākaunui a Simon ki te whakapakari i tōna reo Māori me tana mārama ki ngā tikanga Māori.

Nō Simon te tū whakaiti, mōna kua whakawhiwhia ki te France New Zealand Friendship Fund. Koia te pūtea āwhina i ngā kaupapa tūhonohono i ēnei whenua e rua.

 

Tania Te Whenua

Pou Rangahau Rautaki Kōiwi Tania Te Whenua

He uri a Tania Te Whenua nō Tūhoe me Te Whakatōhea.

He Tohu Paetahi, he Tohu Paetahi i ngā Ture Hoki a Tania i roto i te Whakahaere Rawa Māori. He matatau a ia ki ngā tikanga me te reo Māori.

I tīmata a Tania ki te mahi hei kairangahau ā-kirimana mō te Hunga Whakahoki Kōiwi i Akuhata 2008. I mua i taua tūnga e mahi ana ia hei Kairangahau Matua Mātauranga Māori i Te Papa. I taua tūnga rā, nāna i rangahau te whakarite hou i te whakaaturanga Mana Whenua.

Whakaako anō a Tania i ngā kaupapa whakarite mātauranga i roto i te reo Māori me ngā tikanga mō Te Whare Wānanga o te Ūpoko o te Ika a Māui me te rāngai tūmatanui.

 

Nicola Kiri Smith

Pou Rangahau Rautaki Kōiwi Nicola Kiri Smith

He uri a Nicola Kiri Smith nō Taranaki, Ngāti Maniapoto, Ngāti Mahuta, Ngāti Toa Rangatira, me Ngāti Pikiao. I whakatipua ia ki Opunake, ā, i noho ki Kirikiriroa mō ētahi tau. I hunuku mai ki Te Whanganui-a-Tara i Whiringa-ā-rangi 2007.

I haere a Nicola ki Te Whare Wānanga o Waikato, ka riro mai he Tohu Paetahi i ngā Pūtaiao Pāpori (Kairangi) i roto i te akoranga pāpori me te akoranga tangata. Ko ēnei anō kei a ia, te Tiwhikete ā-Motu mō te Ahurea Maori me te Hītori o Aotearoa, me te Tiwhikete ā-Motu mō te Akoranga Rorohiko. He kaiwhiwhi nō mua a ia o te Karahipi Rangahau Raumati me te Child Accident Prevention Foundation o Aotearoa.

I mua i Te Papa, i mahi a Nicola i Te Whare Wānanga o Waikato, te Kōti Whenua Māori o Waikato-Maniapoto, me te Taraipiunara o Waitangi. E kaingākau ana a ia ki te ture whenua Māori, te whakapapa, te hītori Māori, te pupuri i ngā tikanga, me ngā momo rangahau i te ao pāpori-pūtaiao. 

 

Louisa Joblin

KaitūaoLouisa Joblin (Hakihea 2011 - Here-turi-kōkā 2012)

 

He ākonga a Louisa Joblin nō Te Whare Wānanga o Te Ūpoko o te Ika a Māui, i reira kua tutuki i a ia tana Tohu Paetahi i te Hītori o Ngā Toi, te Reo Itāriana me Ngā Mātauranga Ūropi. I tēnei tau (2012), ka whai i tana Tohu Hōnore i te Hītori o Ngā Toi, te Reo Itāriana me te Tohu Ture (LLB). I roto i tana whakangungu harangote mā Karanga Aotearoa, ko tāna he rangahau i ngā kōiwi tangata me ngā toi moko kei Itāria.

Ko ēnei rangahau te kaupapa o tana tuhinga hōnore, ā, he hōpara i te tukanga whakahoki kōiwi tangata mai i Itāria ki Aotearoa (ko tētahi aronga matua, ko te whakaitāriana i ngā kōrero Pākehā me ngā tikanga Māori, e mārama ai te iwi Itāriana), me te hitōri o ngā kōiwi Māori e noho marara mai rā i Itāria.

E manako ana a Louisa, ka tutuki i a ia tana Tohu Paerua i te tau 2013. Koia e whakawhānui ana i tana tuhinga hōnore kia hōhonu ake te ruku i te hitōri ā-toi, ā-ahurea o te kohi me te whakaatu o ngā kōiwi tangata, o ngā toi moko i Itāria.

 

Coralie O'hara

Kaitūao (Haratua - Hakihea 2011)

  Coralie O'hara 

He pia a Coralie O’Hara nō Te Whare Wānanga o Te Ūpoko o te Ika a Māui, kei te whai ia i tana Tohu Paerua Museum and Heritage Studies. I whai tūranga whakangungu hoki a Coralie ki Karanga Aotearoa (he tūranga harangote) tae atu ki te mutunga o te tau 2011. I a ia i konei, ko tōna aronga matua ko te rangahau i te hokohoko kōiwi tangata me ngā kaupapa here o te ao e pā ana ki te whakahokinga o ngā kōiwi tangata ki ō rātou kāinga tūturu.

Nō Tāmakimakaurau a Coralie. I riro i a ia tana tohu Paetahi BA (whai Hōnore Te Ranga-Mātāmua) i te Mātauranga Tikanga Tangata i Te Whare Wānanga o Tāmakimakaurau. I a ia e whai ana i tērā tohu, ka aro mai a Coralie ki te kaupapa whakahoki kōiwi tangata i te mea, koia te whiringa o te matatika, ki ngā mātauranga tikanga tangata ā-papori, ā-koiora i raro i te horopaki o te whare pupuri taonga. Ko te tukanga whakahoki kōiwi tangata i Aotearoa te kaupapa o tana tuhinga Paerua.

 

Ruben van Mansum

Kaitūao (Paenga-whāwhā - Pipiri 2011)

  Rube can Muncum 

I whānau mai a Ruben van Mansum i Tatimana (he Kiwi tonu ia). E waru wiki tana noho kaitūao i waenganui i a Karanga Aotearoa me Te Ohu Kohi Taonga Toi o Te Papa Tongarewa hei whakatutuki i tana whai tohu paerua i roto i ngā mahi tiaki taonga ki Te Whare Wānanga o Waitaha.

I tipu ake ia i Whakatū, ka whai tohu paetahi (BA) ki Te Whare Wānanga o Waitaha i te tau 2006. E rua tau a Ruben e whakaako ana i te reo Pākehā ki Hapana (te akoranga JET) i mua i tana kuhunga ki Te Wānanga o Leiden (kei Tatimana) mō te MA i te Hītori Toi, ko ngā peita hinu o Hapana, he taera peita nō Ūropi, nō te wā Taishō (1912-1926)

Nā ōna rangahau i ngā toi me ngā tikanga o Hapana, kei te aro atu a Ruben ki Ngā Ariā o te Ao Toi, otirā, te aronga ki tua o tō te ao Pākehā titiro ki te hitōri o ngā toi me te whai pānga o tēnei tirohanga ki te waihanga tuakiri ā-ahurea. E manakohia ana, nā tana mahi i raro i te maru o Karanga Aotearoa kua hōhonu te ruku, kua mārama tana titiro ki te waihanga tuakiri mai i ngā taonga Māori, mai i te ao Māori.

 

Sarah Fruendt

Kaitūao (Paenga-whāwhā - Hōngongoi 2011)

Sarah FreundtNō Tiamani a Sarah, i whai tana Tohu Paerua mai i Te Wānanga o Bonn, ko ana kaupapa ko te Mātauranga Tikanga Tāngata ā-Papori, ko te Ture Taihara me ngā Tuhinga Whakatairite i Huitanguru 2011.

I tētahi tūranga kaitūao i te Uebersee-Museum i Bremen (Tiamani), ka rokohanga i te kaupapa tautohenga o ngā kōiwi tāngata e noho marara ana ki ngā muhiama puta noa i te ao. Nāwai rā, ko te kaupapa o tana tuhinga roa, ko ngā kōiwi tāngata i te muhiama o Bremen. Ko te aronga matua, ko te rangahau nō hea aua taonga. Tāpiri atu ki tēnā, ko te aranga mai o ngā kaupapa pēnei, ko te whakahokinga atu o ngā kōiwi ki ō rātou pūtakenga mai. Kia mārama ai tōna tirohanga ki te iwi Māori, me te kuhu mārika ki tēnei kaupapa, kua pae mai a Sarah ki Karanga Aotearoa hei kaitūao.

Ko te manako ia, ka tuhia tēnei kaupapa kōrero e Sarah hei PhD. Māna pea e aro mai ngā muhiama o Tiamani ki ngā tikanga Māori, otirā, ki te kaupapa nei. Mā reira e tīmata ai tētahi whakawhitinga ariā, tikanga, wheako, kōrero hoki i waenganui i ngā muhiama me ngā iwi nō reira aua tīpuna.

 

Julia Ferloni

Kaitūao (Hui-tanguru – Poutū-te-rangi 2011)Julia Ferloni

He kaitiaki taonga Wīwī a Julia Ferloni nō te INP (French National Institute for Heritage), koia te whare whakangungu i ngā kaitiaki taonga me ngā kaiukauka. He tohu ōna i ngā kaupapa pēnei i te Mātauranga Whare Taonga, Hītori, Hītori o Ngā Toi (ko Ngā Toi o Te Moana-nui-a-Kiwa te aronga) me te Mātauranga Tikanga Tāngata ā-Pāpori

E whā wiki te noho a Julia ki Te Papa Tongarewa hei kaitūao i raro i te maru o te tira Kohinga Taonga o Te Moana-nui-a-Kiwa, te tira Mātauranga Māori me Karanga Aotearoa hoki. I a ia i konei, ko tāna he whakarite i tētahi whakaaturanga taonga nō Te Moana-nui-a-Kiwa mō te Rouen Natural History Museum (Normandy, Wīwī). Nā ngā tira e rārangi mai nei ia i tautoko. He kohinga o ngā taonga tuauki nō Te Moana-nui-a-Kiwa kei tērā whare taonga e takoto ana. Ko ētahi he mea kohi i te tau 1839 rā anō.

Ko te Natural History Museum o Rouen te whare taonga tuatahi o Wīwī i whakahoki mai i ngā Toi Moko ki Aotearoa.

 

Laura Kraak

Kaitūao (Hōngongoi – Here-turi-kōkā 2010)Laura Kraak

He ākonga Tatimana a Laura Kraak nō te Whare Wānanga o Utrecht. Kei te whai i tana Tohu Paetahi Aronui, Pūtaiao, ā, e aronui ana ki Ngā Mātauranga Whare Taonga me te Hītori o ngā Toi, e aroiti ana ki te Mātauranga Tikanga Tāngata. Ā tērā tau, ka whai i tana Tohu Paerua i Ngā Mātauranga Taonga Tuku Iho, me Ngā Mātauranga Whare Taonga.

E rima wiki te roa o te noho kaitūao a Laura ki Karanga Aotearoa. I taua wā, nāna tētahi rārangi taonga i rangahau mō ngā whakawhiti kōrero i waenganui i ngā whare taonga o Tatimana. Nāna anō tētahi tuhinga mō te hohoko toi moko i Pēwhairangi i arotake.

Kei te kaingākau a Laura ki te kaupapa whānui o te whakahoki taonga, ahakoa kōiwi tāngata, ahakoa taonga, ahakoa whakaahua, ahakoa he aha. Ko ngā huarahi e whāia e ngā hapori ko rātou te pūtakenga mai o ērā taonga, kia whahokia atu aua taonga, ko ngā tirohanga rerekē o ngā hapori o Ūropi me ō rātou koroni, koia rā ngā kaupapa o tana tuhinga roa.

 

Alice Christophe

Kaitūao (Hōngongoi – Here-turi-kōkā 2010)Alice Christophe

He ākonga Wīwī a Alice Christophe nō te École du Louvre. I tīmata tana whai i te Tohu Paerua i Te Mātauranga Whare Taonga i te tau 2010. Ko te hītori o ngā kohinga me ngā kaupapa here ahurea tāna e rangahau ana.

E ono wiki tana noho ki Te Papa hei kaitūao, ko te kaupapa here tikanga rua tōna aronga. Kei te ngākaunui ia ki Ngā Toi o Te Moana-nui-a-Kiwa, ki ngā aronga auaha me ngā tauira o te tikanga ruatanga o Te Papa Tongarewa. Kei te whakatairitehia ki ngā tauira o Ūropi. Ko tāna e manakohia ana, mā te whakawhitiwhiti ā-tangata, ā-kōrero hoki i waenganui i ngā whare taonga huri noa i te ao e whānau mai ai tētahi tū whare taonga hou. Ko te momo whare taonga e aro atu ana ki ngā tikanga a ngā iwi katoa, ā, ka rangona ngā reo o tēnā, o tēnā hapori.