Ka puta a Matariki, ka rere a Whānui, ko te tohu o te tau.
Ko Matariki kei Te Papa - Te Whakanui i a Matariki
Ko te ‘hauora’ te kaupapa o te taiopenga o tēnei tau, ā, kei te whakanui te hōtaka i ngā ariā o te oranga tinana me te oranga wairua, me ngā hapori ora, ngā ahurea ora hoki. Ka whai wāhi ki tēnei taiopenga e rua wiki te roa he pūoro taketake, o nāianei hoki, he matapakinga ā-tina, he tauwhāinga taka Kai Hāngī Matariki, me ētahi mahi whakangahau mā te whānau.
He mea tino waiwai te āhua o Matariki ina kitea i te rangi. Mehemea he mārama te tiaho mai a ngā whetū o Matariki, e ai ki te whakaaro ka mahana, ka haumako te tau e tū nei. Mehemea he kōtuhi, he kārohirohi hoki te āhua o ngā whetū, hei takurua makariri kei te haere – me aro atu ngā mahi katoa i te wā Matariki ki tēnei āhuatanga.
Ka puta anō hoki a Puanga tata ki taua wā, ā, mō ētahi iwi e hira ana te putanga mai o Puanga, ka whakanuia kētia hoki.
I te wā o Matariki ka whiwhi tikanga wairua ngā mahi katoa e pā ana ki te whakarato oranga ā-rā, ā, e ahu mai tēnei i te tikanga whakaute i te mātāpuna ora. Whakatōia ai ngā tipu kai, ka inoia a Rongo-mā-Tāne kia whai hua aua tipu.
He wā pai anō hoki hei katokato pikopiko me te whānuitanga o ngā kākano māori. Ko te wā tika anō hoki mō te hao me te hī ika i roto i te hōhonutanga o Tangaroa kia whiwhi whakaputunga nui ai i te raneatanga o ngā ika heke.
I te ao tūturu e whakaora ana anō, i te tīmatanga o tētahi tau hou, he wā whakangā, he wā whakaaroaro – mō te tau kua hipa me te tau e heke mai nei. Nau mai ki waenga i a mātou mō ngā mahi whakangahau e rua wiki o Matariki. Hākinakinatia ngā mea katoa e whakahaeretia ana e Te Papa i tēnei wā hira.
Whakanuia te Tau Hou Māori ki Te Papa!