Rongomaraeroa 

  

Curriculum links

Ngā tino wāhi ako

  • Tikanga ā Iwi
  • Ngā Toi - Toi Ataata
  • Pāngarau

Ka noho i raro i ēhea whenu?

  • Tikanga ā Iwi - Te Wāhi me te Taiao, Te Ahurea me te Tuku Ihotanga
  • Ngā Toi - Mōhiotanga
  • Pāngarau - Āhuahanga

Ngā tino pukenga

Ngā Pūkenga Mōhiotanga, Pūkenga Whakaoti Rapanga, Pūkenga Tatai

Ngā reanga

1-8

Ngā tau

1-13

ki runga ano

E tautoko ana i ēhea kaupapa kōrero?

  • Kōrero Pūrākau
  • Te Auaha Hangarau me te Tene
  • Pāngarau me te Porihanga
  • Ngā Toi me ngā Kaitoi o Aotearoa

 

E hia te roa o tēnei mahi?

E 15-20 miniti ki te torotoro i ngā wāhanga katoa o Te Marae.

ki runga ano

Ka kimihia ki hea?

  • Te Papa tuawhā, kei te taha o Mana Whenua
  • Kua ngaro koe? Me pātai ki tētahi Kaimanaaki Manuhiri.

He aha te take me heri au i taku akomanga ki tēnei taonga?

  • He tauira ahurei o ngā hoahoa, ariā o tētahi marae.
  • He tauira whakaharahara o te whakamahi i ngā āhua toi o ēnei rā ki te whakaatu i ngā kōrero tuku iho.
  • He marae ora, he marae mahi, ā, nōu hoki te marae nei.

ki runga ano

He aha ngā mahi kei taua whakaaturanga?

  • Eke atu me te uru atu ki roto i te wharenui ki te titiro ki ngā tauira i runga i te pakitara, tae atu ki te tuarongo.
  • Whakamahia te poraka mirimiri, ki te whakakī i tō whārangi whakapapa, i te tēpu i roto i te wharenui.
  • Mehemea he pai te āhua o te rangi, haere ki waho ki te waharoa, ki te titiro ki ngā tūmomo whakairo, me ngā mahi toi, kei te tomokanga o Te Ātiawa i te putanga atu.
  • Titiro ki te haki. Ka tohu taua haki i te iwi e pupuri i te mana o te paepae o Te Papa, i te iwi nā rātou ngā taonga i te whakaaturanga iwi, me te tohu hoki i te kawa mō te pōhiri.
  • Pānuitia ngā mātārere, me te pānui whakamōhio e tū motuhake ana hei ako i te whakapapa o Rongomaraeroa.
  • Whakamahia te pāhekoheko ā-rorohiko e pā ana ki te pōhiri.

ki runga ano

Me aha taku mōhio ki tēnei whakaaturanga?

  • Nā te kaiwhakairo tohunga, nā Cliff Whiting, me te rōpū tohutohu Māori o Te Papa, Ngā Kaiwawao, i whakaputa te ariā ki te whakawhanake i tētahi marae mahi, ki te tautoko i te ariā o te mana taonga, me ngā mātāpono o Te Tiriti o Waitangi. I whakatuwhera ōkawatia te marae nei i te 30 o Whiringa-ā-rangi i te tau 1997.
  • E ahu mai ana te ingoa o te marae nei, a Rongomaraeroa, i te ingoa o tētahi wāhi i ngā rangi tūhāhā i hui ai ngā atua Māori i runga i te rangimārie, ki te matapaki me te whakatau i ngā take.
  • Ko te ingoa o te wharenui, ko Te Hono ki Hawaiki, e tohu ana i ngā hononga ki Hawaiki, tētahi o ngā kāinga tawhito o te Māori; ā, ko te rōpū whanaungatanga e tohua ai e whakakapi ana i ngā iwi katoa me ērā atu ahurea nā rātou ngā taonga, kōrero hoki e puritia ana i Te Papa. Ka āta kitea tēnei i roto i te whakairo o te kōrero pūrākau mō Māui e whakarata ana i te rā i runga i ngā maihi o te wharenui. He tangata hira a Māui puta noa i te maha o ngā ahurea o Te Moana-nui-a-Kiwa.
  • Ko te kūaha ōpure, nā Robert Jahnke i hanga, e tohu ana i a Ranginui. E tohu ana ngā papariki i runga i te papa, nā Kura Te Waru Rewiri i hanga, i a Papatūānuku. Ka huakina te kūaha, ka whakatinanatia anō te kōrero mō te wehenga a Ranginui rāua ko Papatūānuku. Nā ngā tauira o Toi Houkura, te kura hoahoa Māori o te Kuratini o Te Tairāwhiti, i hanga ngā moana tukutuku.
  • Kei te tuanui o te wharenui e whakaaturia ana ētahi atu kōrero pēnei i te hanganga o te wahine tuatahi, a Hineahuone, e tōna matua, Tānemahuta, tērā e whakaaturia ana i te tatau o te wharenui. Ka kitea hoki i roto i te wharenui te kōrero mō Māui-nukurau e whakakurī ana i tōna taokete, i a Irawaru, me te kōrero mō Paikea, te tohorā.
  • Kei te tohua ērā atu ahurea o Aotearoa i te tuarongo o te wharenui, ā, e whakaaturia ana te whanaungatanga hurihuri i waenganui i te Māori me te Pākehā i roto i ngā kāpata i hangaia ki roto i te poutokomanawa o te wharenui.

 

Ētahi kaupapa hei matapakinga pea

  • Nōu a Rongomaraeroa. He aha ngā mea o te marae e pai ana ki a koe?
  • Ka pēhea te whakatairite i a Rongomaraeroa ki Te Hau ki Tūranga e tū pātata ana i te whakaaturanga Mana Whenua, kei te papa tuawhā? Arotahia te ariā o te whakamahi i ngā taputapu o nāianei ki te whakaatu i ngā kōrero tuku iho, ka whakataurite ai i ngā tūāhua me te tōtikatanga.
  • Kei te mōhio koe ki ētahi o ērā atu kōrero, mahi toi rānei i roto i te wharenui? Ina koa, ko ērā e pā ana ki a Māui, ki a Tāne rānei. Ka kite koe i ētahi atu?
  • Kei te mōhio koe ki ētahi o ngā tūmomo mahi i runga i te tuarongo o te wharenui? Ka pā ētahi o aua mahi ki a koe, ki tō whānau hoki?
  • Ki tō whakaaro, ka tohu ngā tae i te aha? He aha i kōwhiri ai te kaitoi i aua tae? He ōrite ērā tae muramura, ātaahua hoki ki ngā tae i kitea e ō tātou tūpuna i roto i tō rātou ake taiao pēnei i ngā tae o ngā putiputi me ngā tipu, o ngā manu, o te uku, te kōhatu, ngā hihi o te rā me ngā tae o te āniwaniwa.
  • Whakaingoatia ngā wāhanga matua o te marae me te wharenui. Ko aua wahanga, ko te koruru, ngā maihi, ngā amo, te tāhūhū, ngā heke me te poutokomanawa.
  • I hangaia ngā whakairo mai i te aha? He aha ai? Ko te whakatau, me hanga ngā whakairo mai i te rākau MDF, nā te mea, mehemea i hē ētahi o ngā mahi, kāore e moumoutia ngā rākau māori.
  • Ka kite koe i ngā tauira tāruarua, i ngā raupapa rānei? He aha ngā āhua ka kite koe? He āhua ahurua, ahutoru rānei?

ki runga ano

Ngā kōrero kīnaki

  • Tai Awatea - te pātengi raraunga rongorau a Te Papa. Kei reira ngā hononga atu ki ētahi mōhiohio e pā ana ki a Cliff Whiting, ki te matapahi ōpure o Ranginui, ki te waharoa hoki.
  • www.tepapa.govt.nz/TePapa/English/WhatsOn/LongTermExhibitions/TheMarae.htm
  • Kaua e wareware ki te pānui i ngā mātārere me te pānui mōhiohio e tū motuhake ana.
  • Mehemea e hiahia ana koe ki te tango i ō hū, kei te pai tērā, engari ehara tērā i te tikanga o tēnei marae.
  • He nui hoki ngā mahi whakangahau, me ngā hui, kei te tū i Te Marae. Me titiro ki te maramataka ā-marama o Te Papa ki te mōhio āhea ēnei mahi tū ai.

 

He taonga whai pānga

  • Te Hau ki Tūranga, te wharenui nō Rongowhakaata, kei Mana Whenua, kei te papa tuawhā.
  • Te Takinga, te pātaka kai nō Ngāti Pikiao, kei Mana Whenua, kei te papa tuawhā.
  • Te wharepuni Mākotukutuku, nō Ngāti Hinewaka, kei Mana Whenua,kei te papa tuawhā.
  • Te Huka a Tai, kei Mana Whenua, kei te papa tuawhā. Whiriwhiria te panga hanga marae, titiro ki ngā pukapuka i roto i te taiwhanga pukapuka, ki ngā rauemi me ngā rorohiko i roto i te taiwhanga rangahau.

ki runga ano