Te Waka Taua Teremoe 

Teremoe waka taua (war canoe) in Te Awa Tupua 

Curriculum links

Ngā tino wāhi ako

  • Tikanga ā Iwi, Hangarau

Ka noho i raro i ēhea whenu?

  • Tikanga ā Iwi - Ngā Rawa me ngā Mahinga Ohaoha, Te Ahurea me te Tuku Ihotanga, Te Ao Hurihuri
  • Hangarau - Te Hangarau me te Porihanga

Ngā tino pukenga

Ngā Pūkenga Whakaoti Rapanga me ngā Pūkenga Mōhiotanga.

Ngā reanga

1-8 

Ngā tau

1-13

ki runga ano

E tautoko ana i ēhea kaupapa kōrero?

 

  • Te Porihanga o Aotearoa o Namata, o Nāianei hoki
  • Te Auaha Hangarau me te Tene
  • Kōrero Pūrākau 

E hia te roa o tēnei mahi?

  • E 5-10 miniti mō te waka me ngā taonga e whai pānga ana

ki runga ano

Ka kimihia ki hea?

  • Te Papa tuawhā, Mana Whenua (kei te taha o te wharekai o Espresso)
  • Kua ngaro koe? Me pātai ki tētahi Kaimanaaki Manuhiri.

He aha te take me heri au i taku akomanga ki tēnei taonga?

  • Ka kite i tētahi momo waka i whakamahia i mua i runga i te awa o Whanganui ki te kawe toa, kawe rawa hoki.
  • Ka kite i ngā whakapaparanga mīharo o ngā mahi whakairo.
  • Ka ako ki ētahi o ngā mahi i mua a tēnei waka. 

He aha ngā mahi kei taua whakaaturanga?

  • Katia ō karu, whakarongo ki ngā ngaru, me te toko whakaaro kei te rere atu a Teremoe i runga i te wai.
  • Kōrerotia ngā pūrākau o ngā atua e hāngai ana ki ngā whakairo i runga i tēnei waka taua.
  • Āta tirohia ngā whakapaipaitanga o te waka: ngā puhipuhi, ngā mahi whakairo, ngā anga pāua, me ngā aukaha.
  • Me titiro ki ngā hoe me ngā tatā e tata ana ki a Teremoe.

ki runga ano

Me aha taku mōhio ki tēnei whakaaturanga?

  • I te 21 o Hui-tanguru i te tau 1930, i whakawhiti a Teremoe i te Whare Taonga o Alexander (Te Whare Taonga ā-Rohe o Whanganui) ki te Whare Taonga o Te Whanganui-a-Tara (te Dominion Museum) i runga anō i te tono a te kaikoha, a Ema Hīpango, mō te taha o tōna hoa rangatira, o Waata Wiremu Hīpango (1853-1915) kua mate. I whakaairo a Thomas Heberly nō Te Āti Awa, te kaiwhakairo o Te Whare Tongarewa, i ngā rauawa me ngā taumanu. I tāpirihia anō hoki he tauihu whakairo, nō Matatā, ā, me te taurapa whakamīharo nō Horowhenua.
  • Ko te waka taua a Teremoenō te awa o Whanganui, he waka i whakamahia i ētahi wā i roto i ngā pakanga. I aua wā nō Te Reimana Te Kaporere rāua ko Mātene Rangitauira, he kaihautū hauhau, taua waka. Nā rāua te pakanga i kōkiri i te tau 1864 ki ngā hapū o raro i te awa ki te pana i ngā tāngata Pākehā e noho ana i te tāone o Whanganui. I whakatūria he pakanga, e ai ki ngā ritenga pakanga, ki te motu o Moutoa, he pare kirikiri nui pātata ki Rānana. I tua atu i te whai wāhi atu ki roto i te pakanga, i whakahoki a Teremoe i ngā tūpāpaku nō Moutoa ki te tāone o Whanganui. I Hui-tanguru i te tau 1865 ka whai wāhi a Teremoe ki tētahi atu pakanga Hauhau, tata ki Moutoa, ki Ōhautahi, te wāhi i whakamatea ai te rangatira whakarae o Whanganui, a Hoani Wiremu Hīpango. I muri i tērā i haere anō a Teremoe ki te pakanga, arā ki Pipiriki i te tau 1865, i te wā i whakapae ai ngā Hauhau i ngā hōia e noho ana i reira. I whai wāhi hoki a Teremoe ki te whai i a Te Kooti i te tau 1869, i te wā i hono tahi ai ngā Hauhau me ngā wehenga Kāwanatanga ki te pana atu i te kaingārahu tukipoto i ngā toronga whakarunga o te awa.
  • Whakamahia hoki ai tēnei waka hei kawe rawa mā runga i te awa. Kawe whakararo ai ngā hua ki Pākaitore, te mākete i Whanganui, ā, puta atu ai hoki ki te moana ki te hī ika.
  • Nō reira, he waka taua a Teremoe, he taonga tuku iho hoki. I hangaia te takere ki te tīwai o tētahi rākau tōtara kotahi, ā, ka kitea hoki he mea matakahi te waka i te taurapa. Ka tāpirihia tētahi atu wāhanga ki te waka nei kia roa atu ai. I tapaina te takere anō ko Teremoe.
  • 16.5 mita te roa o Teremoe, ā, i kawe tata ki te 40 ngā toa rātou ko te rangatira me te tohunga. I āta whāia ngā tikanga me ngā ritenga i te hanganga o te waka nei. Hei tauira, i te kōwhiritanga o te rākau pai mō te waka, i ngaro atu te tohunga ki te ngahere ki te tuku karakia ki a Tāne, te atua o te ngahere. Ka āta tuaina te rākau, ka āta poroa, me ngā karakia e haere tahi ana. I ētahi wā ka waiho te rākau i roto te wai kia whakatahea rā anō te tarawai. Nā te whakamānu i te tīwai i whakarite te āhua o te takere o te waka.
  • Kei te tohu te tauihu i ngā kōrero o te orokohanga. Kei te tohu ngā takarangi i te wā mō ake tonu, i te ao mārama me te pō. I wehe a Tāne (te atua o te ngahere) i a Ranginui, tōna matua, ā, kei te tapa o runga ia, i tōna whaea hoki, a Papatūānuku, ā, kei ngā waewae o Tāne ia. Kei mua i te tauihu e noho ana ko Tūmatauenga e pūkana ana, e rapu huarahi ana. Ko Tāwhirimātea e titiro kē ana ki ngā kanohi o ngā toa, kei te pukuriri ki ōna tungāne nā rātou ōna mātua i whakawehe, ā, ka haere whakarunga kia noho ai ki te taha o tōna pāpā. He wā anō ka hoki ia ki te hanga i te kaupapa hāro, me te putanga mai o ngā huripari, ngā āwhā, ngā waipuke me ngā taurakitanga, me ngā aha, me ngā aha.
  •  Ka taea te whakarōpū ngā waka kia toru: te waka taua - ko te momo kairangi rawa atu, ātaahua rawa atu o te waka, i whakamahia ai mō ngā haerenga taua me ngā haerenga i te takutai moana; te waka hī ika - he mea pakupaku atu, he mea more atu, i whakamahia ai ki hī ika i te moana, mō nga haerenga i te takutai moana hoki; te waka awa - he more, he waka tīwai anake, i whakamahia ai mō te whānuitanga o ngā mahi.
  • Ngā wāhanga o te waka taua: te takere - te wāhanga matua o te waka; te taurapa - te wāhanga i te kei o te waka; te tauihu - te ihu o te waka; te taumanu - te paemanu, te nohonga rānei; ngā kōhao aukaha - ki te hohou ngātahi i ngā wāhanga; ngā puru rākau - kia whakarite kia noho pihi ngā kōhao aukaha, kia noho whita hoki ngā aukaha.
  • I hangaia ngā hoe Māori ki ngā rākau mārō mai i te wao nui a Tāne, ki te mānuka, te mataī, te maire, te pukatea me te tawa, ā, ina maroke ēnei momo rākau, he tino māmā rawa, engari he pai mō te ātete i te taumaha me te pēhanga. Kei ia rohe tōna ake momo hoe, me ērā momo he nui ngā whakanakonako e whakamahia ana i ngā wā whai kawa. He mea whakahirahira te hoe, ā, e tiakina ana, e tukuna ihotia ana ki ngā whakatipuranga i whai ake.
  • I hangaia te toko waka kia tau ai ki te āhua o te ringa o te kaitoko - mai i te 2.5 ki 6 mita te roa. I ngā wā o mua ka whakamahia, ka tiakina hoki e ia tangata e kōpikopiko ana i te awa o Whanganui ki runga ake i a Pipiriki i ngā kōhao toko i runga i ngā pari. Tiakina tonutia, whakamahia tonutia aua kōhao toko e ngā kaihoe waka i ēnei rā tonu.
  • Ko te toroa he manu e tino whakahōnoretia ana e te Māori, ā, e tohu ana ngā huruhuru mā o te toroa i runga i te waka i te kaha me te ukauka. E tohu ana ngā huruhuru o te kāhu i te tere me te raka.
  • E ai ki ngā tānga a Sydney Parkinson, te kaitoi kaipuke, ko te waka taua te momo waka i tūtakina ai e te Endeavour o Kāpene Kuki i te tau 1769.

ki runga ano

Ētahi kaupapa hei matapakinga pea

  • Tokohia ngā toa i kawea e Teremoe? Titiro ki ngā taumanu ki te whakatau tata. I hangaia a Teremoe ki te kawe i tōna 42 tāngata.
  • Ki ō whakaaro, e tohu ana ngā momo whakapaipai rerekē i runga i a Teremoe i ngā aha? Hei tauira, ngā huruhuru toroa - e mōhiotia ana ngā toroa mō tō rātou kaha me te ukauka, tēnā pea ka tohu ngā huruhuru i aua āhuatanga.
  • Whakatairitea a Teremoe ki Te Aurere iti (kei te taha o Mākōtukutuku, te wharepuni i te whakaaturanga Mana Whenua). He aha ngā rerekētanga matua o ēnei waka e rua? Ko tēhea waka te mea māu e kōwhiri mō te rere huri noa i Te Moana-nui-a-Kiwa? He aha ai? Ko tēhea te mea pai ake mō te pakanga? He aha ai? He waka whai takere e rua, he waka whai rā, he waka tere moana Te Aurere Iti, ā, he wāhi tō taua waka mō te whakaputu rawa. I hangaia kētia a Teremoekia tere tōna haere i ngā awa me ngā takutai moana, ā, i whaona ki ngā atua Māori tērā tonu pea e tautoko i ngā toa i roto i te pakanga.
  • Ki tō whakaaro, i pēhea te hanga o Teremoe? I hangaia a Teremoe ki te aha? Mehemea ki te haere koe ki te ngahere ki te hanga i te waka pēnei, kāore ō taputapu hou ki te hanga, ka pēhea tō mahi i tēnā? Kei ngā iwi Māori he ritenga ka whakamahia i te wā hanga waka. Ka tono whakaaetanga te tohunga mai i a Tānemahuta, te atua o te ngahere, i mua te tapahanga o te rākau hei hanga waka. I hangaia a Teremoeki te tōtara. Ko ngā mahi uaua ko te hanga i te takere me te hahau i te waka. I tua atu i te hahau whakamahia ai te ahi i ētahi wā ki te whakawātea i ngā kongakonga rākau. I whakairohia ngā whakairo rauangi ki ngā taputapu kōhatu i hangaia ki te pounamu me te argillite. I ēnei rā whakamahia ai ngā taputapu o nāianei tae atu ki ngā pāraharaha maitai.
  • I noho a wai ki hea? He aha ai? Ki te tikanga, i noho te rangatira i waenganui i te waka ki te whakahau i ngā toa. Ka noho ngā toa ki ērā atu nohonga katoa hāunga ia te wāhi kei reira ngā moko e rua. Ka rāhuitia taua nohonga mō te tohunga.
  • Ko ngā aha ērā atu taputapu tata ki a Teremoe, tērā i whakamahia i ngā wā e rere ana a Teremoe? I whakamahia ngā hoe i te taha o Teremoeki te hoe i te waka. Kei te kī te whakataukī, ‘Mena ka pai tō tiaki i tō hoe, ka pai hoki te tiaki a tō hoe i a koe.’ I whakamahia ngā tatā ki te tatā atu i te wai i roto te waka.
  • He aha ngā momo waka e whakamahia ana i nāianei ki te kawe toa, hōia, utanga hoki?
  • Kei te whakamahi tonutia ngā waka pēnei i a Teremoe i ēnei rā? Kei te whakamahia mō te aha? Ko te tikanga, whakamahia ai ngā waka pēnei i a Teremoei ēnei rā mō ngā mahi whai kawa.
  • Matapakia te hiranga o te ahurea waka ki te tuakiri Māori nā te mea he nui ngā iwi i tae mai ki Aotearoa i runga waka pēnei. I te tangata e pepeha ana, ka whakahuaina tōna waka. Nō reira ko te waka he tohu tuakiri.

ki runga ano

Ngā kōrero kīnaki

  • Kei te papa tuawhā a Teremoe, e anganui atu ana ki te whakaaturanga Signs of a Nation   
  • Ka wātea tēnei wheako i ngā haora katoa e tuwhera ana Te Papa Tongarewa. Ka tuwhera a Te Papa Tongarewa ia rā mai i te 10 am ki te 6 pm, ā, tae noa ki te 9 pm i ngā Tāite
  • Ko Teremoe tētahi o ngā whakaaturanga wā roa a Te Papa.
  • E rua ngā putanga atu ki a Teremoe i te papa tuawhā. Te wāhi e anganui atu ana ki te whakaaturanga o Te Tiriti o Waitangi, ā, mā te whakaturanga o te iwi o Whanganui, Te Awa Tupua.
  • Nelson, Anne. 1991. Māori canoes - Nga waka Māori. Auckland: Macmillan.
  • Best, Elsdon. 1925. The Māori canoe: an account of various types of vessels used by the Māori of New Zealand in former times, with some description of those of the isles of the Pacific, and a brief account of the peopling of New Zealand. Wellington: Board of Māori Ethnological Research for the Dominion Museum.
  • Evans, Jeff. 2000. Waka taua: the Māori war canoe: Auckland: Reed.
  • Evans, Jeff. 1997. Nga waka o nehera: the first voyaging canoes. Auckland: Reed.
  • Tahere Tikitiki: the making of a Māori canoe. 1974. National Film Unit. Maori Waka Image Gallery.
  • http://transitofvenus.auckland.ac.nz/wakavoyaging/waka_pg_waka.html
  • http://www.wakaama.co.nz/  
  • http://www.maoriart.org.nz/noticeboard/nga_waka
  • http://www.maoriart.org.nz/about/committees/nga_waka

ki runga ano

He taonga whai pānga

  • Te Awa Tupua( te whakaaturanga o te Iwi o Whanganui), kei te papa tuawhā tata ki te pouaka korowai Māori.
  • Te Aurere iti (he waka tere moana tēnei, e rua ngā takere), te papa tuawhā, kei Mana Whenua, kei te taha matau ake o te whakaaturanga Iwi Moriori. I reira e rua ngā hoe hoki hei tirohanga māu.
  • Te Punga a Kupe, kei te papa tuawhā kei Mana Whenua, kei te taha mauī o te wharepuni Mākōtukutuku.
  • Te waka whakamaumahara, (waka takere hei tohu whakamaumahara), kei te papa tuawhā, kei te tomokanga ki te whakaaturanga Te Awa Tupua. He waka wairua hoki i te taha tomokanga, tata ki Te Aurere iti, kei Mana Whenua.
  • Tauihu - e rua ngā tauihu nō Whanganui kei te taha o te tauihu o te waka o Teremoe. Kei te papa tuawhā o Te Papa Tongarewa.
  • Hoe - e whā ngā hoe tata ki a Teremoe me tētahi atu kei roto i a Teremoe anō. Ka kitea hoki ngā toko waka kei te putanga atu o te whakaaturanga o Te Awa Tupua, anganui atu ki te waka tete, kei te papa tuawhā o Te Papa Tongarewa.
  • Te whare tapere iti o Te Puna Whakaari (he reo kōrero mai i te awa o Whanganui), kei roto i te whakaaturanga o Te Awa Tupua, kei te papa tuawhā o Te Papa Tongarewa.
  • He Huinga Amorangi - kei konei ka taea e koe te titiro ki ētahi whakaahua o ētahi waka i runga i te awa o Whanganui me ngā iwi i whai pānga ki te awa. Kei te whakaaturanga o Te Awa Tupua, kei te papa tuawhā, kei Mana Whenua.
  • Te waka tete (he waka awa iti) i whakamahia ki te hī ika me te whakawhiti i te awa. Kei te whakaaturanga Te Awa Tupua, kei te wahanga ‘Te Ao Āpōpō’ kei te papa tuawhā, kei Mana Whenua.
  • Waka pūhara - kei te pouaka whakaaturanga o Te iwi Moriori he waka pūhara. Kei Mana Whenua, kei te taumata tuawhā o Te Papa Tongarewa.
  • He tauira o te waka tīma, o te Waimarie, me te waka whai pūkaha o Parinui. Kei te wāhanga tuarua o ‘Te uku me te rino’ kei te whakaaturanga o Te Awa Tupua, kei te papa tuawhā, kei Mana Whenua.
  • Te ārai kiriata. Ka mātakitaki koe i runga o Teremoei te kiriata tāruarua e pā ana ki te oranga i ngā tahataha o te awa o Whanganui me te kāhui maunga.
  • Te pā tuna, te utu piharau, me te pā auroa. Kei tua atu i a Teremoengā tauira o ēnei hangarau ahurei onamata mō te hopu tuna.
  • Ētahi mahi toi nā ētahi tamariki o Whanganui mō te ora i runga, i ngā tahataha hoki o te awa. Kei te Discovery Centre Te Huka ā Tai, kei te taumata tuawhā kei Mana Whenua.
  • Ko te pakitara matua o Te Papa Tongarewa. I tō tomokanga mai ki roto i Te Papa ka kite koe i te pakitara matua, he mea kōmā, i te taha katau. I āta hangaia kia rite te āhua ki tō te waka me te tohu i te tauihu me te taurapa hoki o te waka.

ki runga ano