Te Whare Pora: the House of Weaving 

Te Whare Pora: Te Whare o te Raranga, Whatu hoki

Ko Hineteiwaiwa te atua nui o Te Whare Pora – Te Whare o te Raranga, Whatu hoki.  Ki ētahi iwi ko ia te tamāhine a Tāne rāua ko Hine Rauamoa. E mōhiotia ana tēnei atua puta noa i ngā moutere o Te Moana-nui-a-Kiwa, kāore ki te Māori anake.

I whakatinana a Hineteiwaiwa i ngā mahi o Te Whare Pora me ngā toi wāhine. Whai atu i tēnei koia anō te kaitiaki o te whakawhānau. I neherā, i tohia ngā tamariki wāhine katoa ki a ia. I ara ake i a Hineteiwaiwa te tūranga ruahine, te wāhi ki te wahine hei hiki i te tapu i ngā whare hou.

Koia anō te ariki o te aho tapairu, he tātai wāhine rangatira. I ētahi wā, kīia ai te atua nei ko Hina, te whakatangatatanga wahine o te marama.

Kīia ai Te Whare Pora he ‘momo oranga’ ā, he wāhi anō hoki. Hāpaitia ai ngā mahara o ngā kairaranga i tomo ai ki te whare nei, kia āta rite mō te ngongo i te mātauranga. I taea tēnei mā ngā karakia me ngā hou.

Ko te whakapono ia, mā te karakia ka tuwhera, ā, ka pūmau te hinengaro o te ākonga. Ka mau wawe te māramatanga me te hiahia ki te ruku i te hōhonutanga o te mātauranga.  Ka whāia e ngā kairaranga ngā mātauranga raranga katoa, tae atu ki ngā ariā wairua.

Ruarua noa iho ngā kairaranga o ēnei rā kua puta i te hou nei. I whakakorea e ngā mihingare, he ārai karaitiana hoki tēnei ki a rātou.

Kei roto i ngā mahi a Te Whare Pora ko te tāniko, he mahi whakarākai i ngā remu kākahu, tae atu ki ngā korapa manu, ngā tāwhiti manu, me ngā hīnaki tuna. He rite te tāniko ki tā te Pākehā whatu, e kī anei ko te Twining.

I ēnei rā e mahia ana te tāniko hei tātua, hei kete iti, hei pari, hei pare ringa, hei tīpare, hei tāpeka hoki.

Ko te arapaki, ko te tukutuku rānei, ngā  whakarākai e kitea nuitia ana i ngā pakitara o te wharenui.

Ko te piupiu he toi hanga kaka harakeke e mau ana i te hope.

Ko te whatu he momo anō, arā, te ‘whatu kākahu’, ā, e whakamahia ana hei pueru.

Ko te whiri he momo anō hei mahi poi, mahi maro, mahi tīpare.

Ko te raranga he momo anō hei mahi kete (ngā pēke me ngā pahikete).