Te Tohutoa a Te Pahi

He taonga nui te tohutoa a Te Pahi ki te motu whānui: ko te koha tapu tuatahi nā te kāwanatanga ki tētahi rangatira Māori.

Hānuere 1806: Ka hoatu te tohutoa

Ka whakaritea e te Kāwana o Niu Haute Wēra, e Philip Gidley King, kia hanga he tohutoa hei tohu i te haerenga a Te Pahi ki Poihākena, e toru marama nei te roa. Tērā pea he mea hanga i ngā pouaka wāti e rua nā John Austin, he mauhere kaihanga tohutoa.

Ka hiahia a King kia whiwhi tōna koroni ki ngā rawa i ā Te Pahi, māna hoki ngā kaipatu tohorā, ngā kaihokohoko i Pēwhairangi e tauārai. He tikanga hoki tā Te Pahi ko te whakaū i te mahi tauhokohoko me te whiwhi hangarau hou.

Philip Gidley King

Caption

I te wā ka manaakitia a Te Pahi, māuiui kē a King, kua wherū i te noho ture kore o te koroni o Niu Haute Wēra. Ka rua ngā tau ka mate i te tau 1808.

Philip Gidley King, takiwā o 1800, tē mōhiotia ki te ringatoi. State Library of New South Wales (IE204307)

Takiwā o 1810: Ka ngaro te tohutoa

I te tau 1810, ka pā te kino ki Te Taitokerau. Ka wepua te tamaiti a tētahi rangatira o runga i te Boyd, he waka utanga. Nā, ka rapu utu, parekuratia ana te katoa o ngā tāngata eke. Ka whakapaetia hētia a Te Pahi.

Kia ea tonu te mate – pāhuatia ana te motu a Te Pahi e ngā kaipatu tohorā, ka patua me te mea e 60 Māori. Nō te tārukenga, ka taotūtia kinotia a Te Pahi, ka ngaro te tohutoa.

I ponitaka te whenua o Te Pahi i te rohe o Rangihoua i Pēwhairangi.

Caption

I ponitaka te whenua o Te Pahi i te rohe o Rangihoua i Pēwhairangi.

Ranghe Hue [Rangihoua] a New Zealand Fortified Village, The Residence of Warri-Pork [Wharepoaka], 1827, nā Augustus Earle. National Library of Australia (T178 NK12/141)

Ka ngaro te tohutoa ki hea?

Ka ngaro mārika te tohutoa a Te Pahi mai i ngā tau 1810 ki 2014. Kotahi anō te wā i kōrerotia ai, ki tētahi ōhākī i Ahitereiria i te tau 1899. He mea huna tāna hokinga atu i Pēwhairangi ki Ahitereiria.

Paengawhāwhā 2014: Ka puta ake anō te tohutoa

I te tau 2014, ka puta ake anō te tohutoa i te whare mākete o Sotheby’s ki Poihākena. Ka kimi tikanga ture a Ngāpuhi kia kaua ai te hoko, tērā kei riro atu anō ki tētahi kaikohi tūmatawhāiti.

I te rā hoko, ka ngeri a Ngāpuhi i waho o te wāhi mākete. I taua wā tonu, tuku ngātahitia ana he tono e Te Papa me Tāmaki Paenga Hira i runga i te reo tautoko a Ngāpuhi – nā, ka toa.

Whiringa-ā-rangi 2014: Ka hoki mai te tohutoa

Nō te marama o Whiringa-ā-rangi 2014, i Pēwhairangi, ka whakatauria e ngā uri te tohutoa a Te Pahi. Nō muri, ka hoatu ki ngā ringa o Te Papa me Tāmaki Paenga Hira, hei ngā kaitiaki hou.

I tēnei wā, ko Te Papa te kaitiaki o te tohutoa a Te Pahi – he whakamānawa hoki i tētahi rangatira mana nui, he tohu piringa tata i waenganui i ngā iwi e rua.

Ngā whakaahua

Te Tohutoa

""

Caption

Te Tohutoa a Te Pahi (mua). Te Papa Tongarewa me Tāmaki Paenga Hira

+""

Caption

Te Tohutoa a Te Pahi (tua). Te Papa Tongarewa me Tāmaki Paenga Hira